بالنسبة للى حصل يوم 9 ابريل يوم السبت الفجر ...بصراحه انا اول ماسمعت الموضوع ده اتضايقت جدا انا دايما ضد استخدام العنف ضد اى حد
وشايفه انه من ضمن اسباب قيام الثورة هى استخدام الشرطة للعنف قبل الثورة ولما استخدموا العنف يوم 25 يناير كان ليه رد فعل قوى وهو نزول اضعاف اضعاف اللى نزلوا الايام اللى بعدها ...فالعنف مكانش حل وكان الجيش يقدر يستخدم طرق تانيه فى فض الاعتصام ده...وتكون سلمية جدا
انا اول ماشفت الظباط المنشقيين طلعوا على المنصة فرحت فى الاول زي اى حد واخداه الحماسه حبتين وشايف انه لو المؤسسة العسكرية فيها فساد يبقى الافضل وقوف الناس ديه فى صفنا بس لما فكرت فيها كويس لاقيت مش من مصلحتنا نهائى تمرد ظباط داخل المؤسسة العسكرية ديه خصوصا لو كان ده عددهم وحتى لو كان عددهم اكبر لكن عددهم القليل مكانش لا فى صالحهم ولا فى صالح حد
المؤسسة العسكرية للاسف هى الوحيده اللى موجوده واقفه على بعضها لو اتهدت (وده هيحصل بالانقسامات اللى داخل الجيش)يبقى هيقع معاها حاجات كتير ...المفروض ماتقعش خالص خصوصا الفترة ديه احنا محتاجينها جدا ...مش معنى كلامى نتجاوز عن اخطائهم ...لا لكن مش من مصلحتنا انننا نشجع حدوث اى تمرد فيها مش هيجى لا فى صالحنا كاشخاص ولا فى صالحنا كبلد
لازم تقوم المؤسسات التانيه اللى وقعت...وعجبنى تشبيه الدكتور معتز بالله عبد الفتاح للمؤسسة العسكرية بااخر عمود فى البيت يعنى لو العمود ده كمان وقع البيت كله هيقع
لازم نبنى العواميد التانيه علشان البيت مايقعش
ولكوا ان تتخيلوا ماذا سيحدث لو العمود ده وقع وافتكروا ايام البلطجيه الدنيا كان عامله ازاى وكنا بنستنجد بمين وقتها ....
النقطة التانيه اللى اقتنعت بيها انه مكانش المفروض يطلع الظباط دول على المنصه مع الثوار المدنيين غلط والمفروض لو فيه اى مشاكل بينهم وبين المؤسسة العسكرية تتحل منهم فيهم مش بالشكل ده اللى اظهر للعالم كله انه فى انقسامات داخل الجيش وده خطر على امن البلد وماتنسوش ان اسرائيل مش بتلعب ...مش معنى كلامى انى بتهم الظباط دول بالعماله (اعوذ بالله) لكن انا اللى اقصده بان اسرائيل مش بتبلعب انه لماهتلاقى انقسامات بالشكل ده هيكون فى صالحها واكيد بتدبر لحاجات كتير بعد اللى حصل ده وممكن تستغل النقطة ديه ضدنا وتنفخ فى النار فتولعها اكتر
الصح من وجهة نظرى الايام ديه انه مانولعش فيها زياده ونبطل نطالب باسقاط المشير حتى لو كان فاسد
احنا لو اسقطناه حاليا ممكن المؤسسة ديه تقع وهتقع معاها البلد
طيب هل معنى ده اننا نعدى اللى حصل فجر السبت يوم 9 ابريل ؟
اكيد لا ..لانه زي مبيتقال ان الثقه بين الجيش والشعب خط احمر فكرامة المصرى ودمه وعرضه 3 خطوط حمرا
مينفعش يتلمسوا نهائى
- وعلشان كده اتنرفزت واستفزيت جدا من البيان اللى نزله الجيش عن فلول الحزب الوطنى (كان سبحان الله قبل الاحداث ديه بيوم مستضيفين الدكتور محمد صبحى فاتكلم عن الفزاعات وحذر اننا هنخلق لنفسنا من الحزب الوطنى فزاعه وكل شوية نقول فلول وطعمية الحزب الوطني ..)
ومش عاجبنى استخدام المؤسسة العسكرية للفزاعه ديه معانا
يعنى لو انتم معترفين بانهم كده ماتحلوا طيب الحزب اللى مش وطنى ده وامنعوا اعضاؤه من المشاركة السياسية لمده طويلة وياريت يتحطوا تحت المراقبه كمان
ينرفز وفكرنى بخطابات مبارك ايام الثورة واكتر حاجه نرفزتنى انكارهم انه فيه ضرب نار حصل ...امال اصوات الرصاص اللى سمعناها فى الفيديوهات ديه كانت ايه؟؟؟؟ بمب؟؟؟؟؟
بجد كان المفروض يحصل اعتذار منهم ويعلنوا انهم فتحوا تحقيق فى اللى حصل وكمان تحقيق سريع مش يقعد بالشهور علشان يريحوا الناس لكن المؤتمر ده كان ليه دور فى نزول الناس اكتر للاعتصام
- والاسوء من ده هو اعلانهم فى المؤتمر انهم هيفضوا اى اعتصام بالقوة وده دخلهم فى عند مع المعتصمين وده مكانش فى صالح حد نهائى
واحترمت ان الجيش مافضش الاعتصام ولاحاجه وديه حكمة منهم واتمنى انهم دايما يتعاملوا معانا بالحكمة ديه
وارجع واقول ان التباطؤ اللى حصل ده سواء كان مقصود منهم او مش مقصود
فهو ده السبب فى اللى احنا فيه ده كله وياريت بلاش تقولولى قانون ياخد مجراه والكلام الفاضى ده
علشان اساسا احنا فى حالة طوارئ والاحكام العرفيه واللى تتيح اننا نقبض على الفاسدين من غير تحقيق زي مابيتقبض على اى بلطجى وياخد حكم عدل من غير اى تحقيقات
والمفروض بقى يتقبض على كل الفاسدين السياسيين ويتحاكموا بسرعه (من غير تاجيلات وجعت قلبنا) لان وجودهم برا السجن خطر على الثورة وعلى مصر وخطر على صحة الفلوس المنهوبه اللى بشايير تهريبها وغسيلها بان من تسجيل مبارك ((اللى طلع بيه علشان يحرق دمنا
بس الحمد لله دمى ماتحرقش منه لانه باين انه كان عايز يوقعنا اكتر مع الجيش ..لكن يمبارك حابه اقولك انه سرقة الفلوس مش تهمتك الوحيده ..تهمك لاتعد ولاتحصى D:))
طب الخلاصه ايه ...؟؟؟؟؟
الخلاصه
- الشباب غلطوا فى حماية افراد المنشقيين المعتصميين ومكانش المفروض ده يحصل لانهم يعتبروا خارجيين عن القانون ومش المفروض نقف فى وش الجيش لما يطلب محاكمتهم ...حقهم بصراحه خصوصا انه وجودهم معتصميين كان فى خطر كبير اوى على المؤسسة العسكرية زي ماقلت فوق
- افراد الظباط المنشقين مكانش المفروض يعتصموا مع المدنيين وضع كان خاطئ ومكانش كمان المفروض يظهروا فى الاعلام قدام الدنيا كده لانهم اظهروا ان الجيش فيه انقسامات وده بيعرضنا للخطر
- الجيش غلط تماما فى فض الاعتصام بالقوة وكان المفروض يتفض بطريقة سلمية تامة
- المؤتمر الصحفى والبيان اللى نزلوا المجلس العسكرى زود المشاكل ولازم يحاولوا يعالجوا المشكلة باساليب تانيه غير الطريقه ديه وتكون سريعه علشان الامور ماتتطورش اكتر من كده وانا متاكده ان المجلس العسكرى لو معالجش الامور بسرعه (خلال الاسبوع ده) الامور هتتفاقم
- ياريت بلاش تباطؤ اكتر من كده فى تنفيذ باقى مطالب الثورة علشان هو اللى وصلنا لده
- نفسي احنا شباب مصر نكون متوازنين واحنا بناخد قرارتنا لان مستقبل مصر فى ايدينا احنا ونفسي التوازن ده برده مش يدينا الخمول لأ بس لانتحمس لدرجة تخلينا نفقد كل شئ ولا نتوازن لدرجة توصلنا لخمول برده هيفقدنا كل شئ نفسي "نتوازن" فى اننا نهدا فى وقت لازم نهدا فيه ويخلينا نتحمس فى قت لازم نتحمس فيه
وفى الاخر انا مع مظاهرات الجمعه طول ما مطالب الثورة لسه ما اتحققتش وفى رايي كمان ان الجمعه ده اجازة ومش بيعطل اى حد وبياكد دايما على المطالب وسرعة تنفيذها
ده كان رايي فى الموضوع وبتمنى اننا نسمع بعض ويكون في بيننا لغة حوار جيده حتى لو مش متفقين فى الراى لكن فى الاخر انا متاكده اننا متفقين فى حب مصر ام الدنيا ربنا يحفظها
